युवतीलाई जिस्काएको र कुटपिट गरेको आरोपमा शुक्रबार गौतमका छोरा प्रविणलाई पीडित युवतीको उजुरीमा वडा प्रहरी कार्यालयले घोराहीस्थित भरतपुरमा रहेको घरबाटै पक्राउ गरेको थियो ।

पक्राउ गरेलगत्तै छोरा प्रवीणलाई छुटाउन प्रहरी कार्यालय पुगेका गौतमले ‘मेरो छोरा निर्दोष छ, किन हिरासतमा राख्ने’ भन्दै प्रहरीलाई सरुवाको धम्की दिएपछि उनलाई वडा प्रहरी कार्यालय घोराहीले समातेर केहीबेर हिरासतमा राखेको हो ।

दाङका प्रहरी प्रमुख एसपी धिरजप्रताप सिंहले केटी जिस्क्याएको आरोपमा पक्राउ परेका आफ्नो छोरालाई छुटाउन वडा प्रहरी कार्यालय घोराहीमा गौतम आएको र त्यस विषयलाई लिएर राजनीतिक पावर देखाएर प्रहरी अधिकारीमाथि जथाभावी गालीगलौज गरेपछि समस्या उत्पन्न भएको बताए ।

एक उच्च स्रोतका अनुसार गौतमले ‘गृहमन्त्री विमलेन्द्र निधिको मान्छे हुँ’ भन्दै घोराहीका प्रहरी प्रमुख इन्सपेक्टर सूर्यबहादुर थापालाई सरुवा गरिदिने धम्की दिएका थिए । त्यसपछि भनाभन भएको र गौतमलाई पहिला कार्यालयबाट बाहिर निकालेको र त्यतिमा पनि नरोकिएपछि प्रहरी जवानले एकछिन हिरासत राखेका थिए ।

यता नेता गौतमले सामान्य कुरालाई लिएर प्रहरी अधिकारी थापाले आफूमाथि अभ्रद व्यवहार गरेको आरोप लगाउँदै कारवाहीको माग गरेका छन् । 

काँग्रेस दाङका सभापति कीर्तिबहादुर खड्का तथा कांग्रेसका क्षेत्रीय सभापतिहरूले संयुक्त विज्ञप्ति जारी गर्दै प्रहरी प्रशासनले ज्यादतिको गरेको आरोप लगाएका छन् । ‘सामान्य घरायसी विवादका कारण केही व्यक्तिहरुलाई थुनेको विषयमा कुरा बुझ्न जाँदा नेता गौतमलाई प्रहरीले दुर्व्यवहार मात्रै गरेन्, हिरासतमा समेत राखियो,’ विज्ञप्तिमा भनिएको छ– ‘यो राजनीतिक पूर्वाग्रह हो ।’

कांग्रेसले इन्सपेक्टर थापामाथि कारबाहीको माग राख्दै त्यसो नभए आन्दोलनमा उत्रिने चेतावनी समेत दिएको छ ।