सुदूरपश्चिमेलीहरुले मंगलबार काठमाडौंमा आफ्नो मौलिक पर्व गौरा धुमधामका साथ मनाउदै छन् । आज सुदुरका बैतडी, दार्चुला, डडेलधुरा, कैलाली, कंचनपुर, अछाम लगाएकाका जिल्लाहरुमा गौरा पर्व हर्षोल्लासका साथ मनाइरहेका बेला काठमाडौंमा पनि यो पर्वको रौनक छाएको हो ।

रोजगार, पढाई र अन्य कामको सिलसिलामामा सुदुरबाट राजधानी आएकाहरुले आफ्नो मौलिक पर्वलाई देउडा खेले खेलेर तथा एक आपसमा शुभकामना आदानप्रदान गरेर मनाउने तयारी गरेका छन् । मंगलबार राजधानीको टुडिखेलमा बृहत देउडा खेलिदै छ ।

यसैबीच प्रधानमन्त्री शेरबहादुर देउवाले नेपालको मध्य तथा सुदूर पश्चिम क्षेत्रमा विशेष रूपमा मनाइने महत्वपूर्ण सांस्कृतिक पर्व गौरा पर्वका अवसरमा आज स्वदेश तथा विदेशमा रहेकामा शुभकामना दिँदै यो पर्व नेपालीको विशिष्ट पहिचान भएको उल्लेख बताएका छन् । 

प्रधानमन्त्रीको सन्देशमा भनिएको छ, ‘हाम्रो देश नेपाल बहुजातीय, बहुभाषिक, बहुधार्मिक र बहुसांस्कृतिक विशेषताहरूको अनुपम संगमस्थल हो । भाषा, संस्कृति, वेशभूषा र संस्कार आ–आफ्नो जातीय पहिचान दिलाउने विशेषताहरू हुन् । यसै सन्दर्भमा परापूर्वकालदेखि मनाइँदै आइएको गौरा पर्व नेपालीको विशिष्ट पहिचानसमेत हो । यस पर्वको महत्वलाई आत्मसात् गर्दै नेपाल सरकारले राष्ट्रिय पर्वका रूपमा लिई सार्वजनिक बिदाको व्यवस्था गरेको पनि स्मरण गराउन चाहन्छुु ।’ 

उनले यस पर्वका अवसरमा सबैमा सुख, शान्ति र समृद्विको कामना गर्दै गौरा पर्वले नेपालीबीच सामाजिक सद्भाव र भ्रातृत्वपूर्ण सम्बन्ध अझ प्रगाढ बनाउन प्रेरणा प्रदान गरोस् भन्ने कामना समेत गरेका छन् ।

२०७४ भदौ १३ मा प्रकाशित ।