कञ्चनजंघा हिमालको मूख्य मार्गमा पर्ने घुन्सा, खम्बाछेन लोनार्क, अम्जिलेसालगायतका ठाउँमा पनि भारी हिमपात भएको छ भने ओलाङ्चुङ्गोलासहित प्रशिद्ध तीर्थस्थल पाथिभरा क्षेत्रमा पनि एक फीटसम्म हिउँ परेको स्थानीयले बताएका छन् ।

पाथिभरा क्षेत्रमा शुक्रबार दिउँसो चार बजेबाट परेको हिमपात अझै नरोकिँदा दर्शनका लागि आएका तिर्थयात्री मर्कामा परेका छन् ।

माथिल्लो फेदीमानै एक फुटसम्म र पाथिभरा डाँडामा सो भन्दा बढी हिमपात भएको पाथिभराका स्थानीयले बताएका छन् ।

पाथिभरा दर्शनका लागि आएका दुई सयभन्दा बढी तीर्थयात्री हिउँ परेपछि माथिल्लो फेदीमै रोकिएका थिए ।

बालबालिका लिएर आएकाहरुलाई हिमपात भएपछि फेदीभन्दा माथि नजान आग्रह गरिएको छ । लामो समयमा वर्षा भएकाले बाली लगाउन सहज हुने भन्दै तल्लो क्षेत्रका कृषक भने हर्षित भएका छन् ।

ताप्लेजुङको फुङलिङ बजारमा किरात याक्थुङ चुम्लुङ ताप्लेजुङ शाखा र कंचनजंगा फुङ्लिङ क्लबको संयुक्त आयोजनामा लिम्बू समुदायको पर्व चासोक तङनाम कार्यक्रमको तयारी अन्तिम चरणमा पुगेको छ ।

भानुजन माध्यमिक विद्यालयको खेलमैदानमा हुने चासोक तङनामे मंसीर २२ देखि २८ गतेसम्म मनाइने पर्वमा लिम्बू धान नाच (याःलाङ), च्याब्रुङ नाच (केलाङ), हाक्पारे, पङ्लुङ, धनुषकाँण हान्ने विविध खेलको आयोजना गरिने छ ।

चासोक तङनामको अबसरमा लिम्बू पहिरनको प्रदर्शनी र लिम्बू कलाकारहरूको सांगीतिक प्रस्तुति रहने, सिरिजंगा च्यालेन्ज रनिङ कप फुटबल प्रतियोगिता पनि हुने किरात याक्थुङ चुम्लुङ अध्यक्ष भद्र बोखिमले बताए ।

सिरिजंगा च्यालेन्ज रनिङ कप फुटबल प्रतियोगिता पुरुष तर्फको विजेताले एक लाख ११ हजार १११ र उपविजेताले ५५ हजार पाँच सय ५५ रूपैयाँ पाउनेछन् । त्यस्तै महिलातर्फको बिजेताले ५० हजार र उपबिजेताले २५ हजार पुरस्कार पाउने छन् ।