• उदयपुर ९ कात्तिक । 

उद्योगबाट अवकाश पाएपछि पनि उद्योग प्रशासनलाई झुक्याइ दोहोरो सुविधा लिएर ठगी गरेको आरोपमा उदयपुर सिमेन्ट उद्योगका द्वितीय तहका एक पूर्व कर्मचारी पक्राउ परेका छन् । 

डेढ वर्षअघि नै सो उद्योगबाट १२ लाख उपदान लिएर अवकाश लिएका त्रियुगा नगरपालिका–११ जलजले बस्ने ६१ वर्षीय शमशेरबहादुर तामाङले उद्योग प्रशासनलाई झुक्याएर नागरिक हितकोषबाट पुनः १२ लाख लिएको जिल्ला प्रहरी कार्यालयले जनाएको छ ।

प्रहरीले तामाङलाई पक्राउ गरेर ठगीसम्मन्धी दर्ता गरेकोे छ । सो उद्योगका प्रवन्धक सुरेन्द्र पौडेल भन्नुहुन्छ – “आफू नै प्रवन्धक भएको बेला यो कार्य यस्तो कार्य भएकामा छानबिन भइरहेको छ ।” 

तामाङले अवकाशसँगै आफूले पाउन पर्ने सेवा सुविधा सबै लिएर पनि फेरि पाएको छैन भनेर पुनः १२ लाख लिएर ठगी गर्नुको पछाडि उद्योगकै कर्मचारीको मिलेमतो हुनसक्ने अन्य कर्मचारीको धारणा छ ।

तामाङकी श्रीमती राजकुमारी तामाङले आफूले १२ लाख फर्काउन तयार भएपनि प्रहरीले जबर्जस्ती कारबाही अगाडि बढाएको बताइन् ।

उदयपुर, २ कात्तिक ।

उदयपुर जिल्लाको त्रियुगा नगरपालिका–१ बोक्से तथा बाबरी क्षेत्रमा एक हप्तायतादेखि बौलाहा कुकुरको बिगबिगी बढेको छ । 

स्थानीयवासी राजकुमार राईका अनुसार एक हप्ताभित्र बहुलाहा कुकुरको टोकाइबाट एक महिला र एउटा गाईको मृत्यु भएको छ भने एउटा बालिका सख्त घाइते भएकी छिन् । 

बाबरीका ७० वर्षीया मनसरी राईको बहुलाहा कुकुरको टोकाइबाट मृत्यु भएको र अर्का १० वर्षीया बालिका रेजिना राई घाइते भएको प्रहरीले जनाएको छ । बहुलाहा कुकुरकै टोकाइबाट स्थानीय राजकुमार राईका गाईको पनि मृत्यु भएको छ । 

छ दिन अगाडि नै कुकुरले टोकेपछि सोमबार एउटा गाईको मृत्यु भएको बताइएको छ । 

गाईलाई बहुलाहा कुकुरले टोकेको थाहा नहुँदा सो गाईको दूध पनि धेरैले खाएका कारण अहिले स्थानीयवासीमा रेबिज रोगको त्रास बढेको गाई पालक राईले बताए ।

यता लोकमार्ग अवरुद्ध हुँदा दसैँमा टाढा–टाढाबाट सिद्धिचरण लोकमार्ग हुँदै पहाडी क्षेत्रको ओखलढुङ्गा, सोलु र खोटाङ हिँडेका यात्रु बाटैमा बिचल्लीमा परेको घुर्मीका यातायात व्यवसायी कुमार लुङ्गेलीले बताए ।

केही यात्रु भने दुईचार दिनसम्म पनि सडक नखुलेपछि पैदल हिँडेर नै कठिन यात्रा गर्दै पहाडी क्षेत्र लाग्न थालेको समेत यातायात व्यवसायीले बताएका छन् ।

पछिल्लो चरणमा जिल्ला अस्पतालमा शल्यक्रिया सहितको सेवा व्यवस्थापन भएपछि अहिले जिल्लाभित्र र बाहिरबाट समेत सेवा लिन आउने बिरामीको सङ्ख्या वृद्धि भएको अस्पतालका प्रमुख डा विष्णुबहादुर बस्नेत बताउछन ।

छ जनासम्म मात्रको शय्या र क्षमताको कोठामा सञ्चालन हुँदै आएको प्रसूति कक्षमा अहिले दैनिक १० देखि १५ जनासम्म प्रसूतिका बिरामी आउन थालेपछि कतिपय बिरामीलाई शय्याको अभावमा समेत अन्य कोठामा लगेर उपचार गर्न बाध्य हुनुपरेको सम्बन्धित चिकित्सक बताउँछन् ।

अहिले दैनिक १० जनासम्म प्रसूति सेवाका लागि आउने गरेकामध्ये दुईदेखि तीन जनासम्म शल्यक्रियाबाट तथा बाँकीको साधारण सेवाबाटै उपचार हुने गरेको अस्पताल प्रमुख डा बस्नेत बताउछन्।

उदयपुर, २ भदौ ।

वर्तमान वैज्ञानिक युगलाई चुनौती दिने गरेर उदयपुर जिल्लाको पहाडी गाविस लाफागाउँ–१ पाकाना, तुम्चीमा अनौठो घटना घट्न थालेको छ । 

वरपर केही छैन, कोही पनि मानिस छैनन्, गाउँको उच्चस्थानको टारमा तीनवटा मात्र घर रहेको स्थानीयवासी बताउँछन् । तर मध्यदिनमा र रात्रिको समयमा अदृश्य शक्तिले ढुङ्गा बर्साउन थालेपछि एक हप्ताभित्र तीनजना स्थानीयवासी घाइते भइसकेको लाफागाउँ गाविस स्वास्थ्य चौकीका अहेब योगेन्द्रकुमार श्रेष्ठ बताउँछन् ।

श्रेष्ठका अनुसार सुरुमा मध्यरातको १२ बजे अचानक तीन किलोको ढुङ्गा स्थानीयवासीको घरभित्र नै खस्दा ओछ्यानमा सुतिरहेकी ११ वर्षीया बालिका सरिता तामाङलाई लाग्दा तामाङ सख्त घाइते भई अहिले अचेत अवस्थामा छिन् ।

 त्यसपछि दोस्रो दिन मध्याह्न १२ बजे दिउँदो स्थानीयवासी जनमुनि राईको घरको आँगनमा ढुङ्गा बर्सन थालेपछि घरको आँगनमा बसेर काम गरिरहेका राई घाइते भई उनी पनि अहिले अचेत अवस्थामा रहेका छन् ।

यस्तै घटना घट्दै गएको चौथो दिनको मध्याह्न १२ बजेको समयमा फेरि आकाशबाट ढुङ्गा बर्सन थालेपछि जनमुनि राईको १६ वर्षीय छोरा घाइते हुन पुगेको लाफागाउँ–३ का ध्रुव बस्नेतले बताएका छन् ।

लाफागाउँभरि घटनाका बारेमा सनसनीपूर्ण हल्ला बाहिर आएपछि गाउँले भेला भएर हेर्न जाँदा पनि घरी–घरी जनमुनि राईको घरको आँगनमा ढुङ्गा खस्ने गरेको र ढुङ्गा कताबाट आयो भनेर नदेखिने तर भुइँमा झरेर बज्रिएपछि मात्र आवाज सुनिने र देखिने गरेको प्रत्यक्षदर्शी बताउँछन् ।

आफ्नै गाउँमा भएको घटनाका बारेमा सुनेर जिल्ला सदरमुकाम गाईघाटमा रहेका नेकपा माओवादीका जिल्ला सेक्रेटरी केदार राईसमेत घटनास्थलमा पुगेका थिए ।

दुई दिनअघि मात्र गाउँको घटनास्थल पुग्नुभएका राईले रात्रिको समयमा गाउँलेसँग घटनास्थलमा बसेर अध्ययन गर्दा मध्यरातमा प्रत्यक्ष रुपमा ढुङ्गा बर्सेको र केही ढुङ्गा भुइँमा खसेको देखेको राईले घटनास्थलबाट बताउँदै पुष्टिसमेत गरेका छन् ।

राईले भने, “म लगायत दशजना गाउँले के हो त वास्तविक कुरा भनेर राति सोही स्थलमा बास बस्यौँ, तर मध्यरातमा अचानक ढुङ्गा खस्न थाले, अनि केही समयपछि खस्ने क्रम रोकियो, खसेका ढुङ्गा तीन देखि पाँच किलोसम्मका रहेका छन् ।”

घटनाका बारेमा राईले जिल्ला प्रहरी कार्यालय उदयपुरलाई खबर गराएपछि प्रहरी चौकी साउनेको टोली पनि घटनास्थल पुगेर अहिले अध्ययन गरिरहेको कुरा जिल्ला प्रहरी कार्यालय उदयपुरले बताएको छ ।

यस विषयमा उदयपुरका प्रहरी नायब उपरीक्षक ओम रानाले भने "हाम्रो प्रहरी टोली घटनास्थल पुगेर अध्ययन गरिरहेको छ, ढुङ्गा खसेको आवाज आउँछ र ढुङ्गाहरु पनि खसेर भुइँमा झरेको पुष्टि भएको छ ।"

लाफागाउँका हर्कबहादुर राईका अनुसार केही महिनाअघि अदृश्य शक्तिको ढुङ्गा लागेर घाइते भएकी ११ वर्षीया बालिका सरिता तामाङ रात्रिको समयमा हराएकी थिइन् ।

राती घरमा अन्य परिवारसँगै सुतिरहेकी तामाङलाई लामो–लामो केस भएको कालो मानिसजस्तो आकृति आएर जङ्गलतिर लगेर गएको उनी बताउँछन् । 

बिहान उज्यालो हुने बेला तामाङलाई उक्त शक्तिले घरमा नै ल्याएर छाडेको र तामाङलाई उक्त शक्तिले यो कुरा कसैलाई नभन्नु, भने राम्रो नहुने बताएको राई बताउँछन् । तर तामाङ्ले उक्त कुरा पहिला दिदी र पछि अरूलाई सुनाएपछि उक्त टोलमा ढुङ्गा बर्सन थालेको राई बताउँछन् ।

ढुङ्गाले लागेकी बालिका तामाङ अहिले अचेत अवस्थामा रहेको र ढुङ्गाको चोट भने नदेखिएको पनि घटनास्थलका प्रत्यक्षदर्शी बताउँछन् ।

यो वैज्ञानिक युगमा अदृश्य शक्तिबाट भएको यस्तो घटनाको वास्तविकता के हो भनेर अध्ययन गर्न वैज्ञानिक अध्ययन नै गर्नुपर्ने निष्कर्षमा प्रहरीसमेत पुगेको छ ।