पूर्वराष्ट्रपति रामवरण यादव क्यान्सर मुक्त भएका छन् । यादवकी छोरी अनिताले आफ्नो बुबा क्यान्सरको संक्रमणबाट मुक्त भएको जानकारी दिएकी छन् ।

अमेरिकाको डेट्रोएटमा रहेको हेनरी फोर्ड अस्पतालमा यादवको सफल शल्यक्रिया भएको थियो । 

असोज १६ गते डा. मनि मेननको नेतृत्वमा रहेको चार सदस्यीय टोलीले पूर्वराष्ट्रपति यादवको प्रोस्टेटको शल्यक्रिया गरेकोे थियो । रोबोटिक सर्जरी प्रविधिमा आधारित शल्यक्रिया करिब चार घन्टामा सकिएको थियो ।

यादव अहिले अस्पतालको अतिथिगृहमा चिकित्सकको निगरानीमा स्वास्थ्यलाभ गरिरहेका छन् । यादवलाई प्रोटिनयुक्त खानेकुराका साथमा आराम गर्न चिकित्सकले सल्लाह दिएको बताइएको छ । यादव उपचारपश्चात् अक्टोबरको अन्तिम साता नेपाल फर्कने छन् ।

यादवको उपचारको सम्पूर्ण जिम्मा सरकारले लिने निर्णय गरेको छ । त्यसको लागि पहिलो चरणमा ६० लाख सहयोग गरिसकेको छ । 

डा. यादवको स्वास्थ्य ठिक हुनु जति सुखद् पक्ष छ त्यति नै कसैले उपचार नपाएरै मर्नु कयौं गुणा बढी दुखद् छ ।

एउटै देशका नागरिकमाथि राज्यले गर्ने विभेद भोग्नु अझ पीडादायी अबस्था हो । 

उच्च शिक्षा हासिल गर्दै गरेकी जुम्लाको चन्दननाथ नगरपालिका–६ की सन्ध्या शाहीले भने उपचार नपाएर असोज १९ गते ज्यान गुमाउनु परेको छ । 

यदि सन्ध्याले पनि यादवको जस्तो उपचार पाएको भए अल्पायुमै मृत्युको शिकार बन्नु पर्ने थिएन ।

दुई वर्ष पहिले नै सन्ध्याको शरीरमा क्यान्सर संक्रमण भएको जानकारी गराईएको थियो । तर उपचारको अभावमा दुई वर्षपछिको मृत्युलाई कुरेर बसिन् ।