एकदिवसीय लिष्ट ए मा नेपाल र नेदरल्याण्ड्सबीच यो तेस्रो भेट हो । यसअघिका दुई भेटमा दुवै टोलीले एक एक खेलमा जित हासिल गरेका छन् । यद्यपि टी-ट्वान्टी फर्म्याटमा भने नेदरल्याण्ड्स अगाडि छ । नेपाल र नेदरल्याण्डबीच अर्को दोस्रो खेल पर्सी हुनेछ । 

विश्व क्रिकेट लिग च्याम्पियनसीपको शीर्ष चारमा पर्ने लक्ष्य राखेको नेपालका लागि दुबै खेल निकै महत्वपूर्ण छ । जगत टमाटाको प्रशिक्षणमा रहेको नेपाली टोलीले कम्तिमा एक खेल जित्ने लक्ष्य बनाएको छ । यदि नेदरल्याण्ड्सले घरेलु मैदानमा नेपालबिरुद्ध जित हासिल गर्ने हो भने उसका ओपनिङ ब्याट्सम्यान स्टेफन माइबर्गको भूमिका महत्वपूर्ण हुनेछ । 

कम्तिमा यसअघिको इतिहासले यहि बताउँछ । उनको प्रदर्शन यसअघिका खेलहरुमा अस्वभाविक छ । गत बर्ष भएको चार टी-ट्वान्टीको शृङखलामा उनलाई नेपाली बलरले आउट गराउनै सकेका थिएनन् । श्रृंखलामा उनले २ खेलमात्र खेलेका थिए, जसमा पहिलोमा ६७ र तेस्रोमा ७१ रनको अविजित पारी खेलेका थिए ।