हत्या अभियोगमा पक्राउ परेकी इन्डोनेसियाली महिला सिती आइस्याहले अाफ्नो अनुहारमा ‘मजाक’कारुपमा तेलजस्तो पदार्थ दल्न ९० अमेरिकी डलर दिइएको बताएकी हुन् ।

अन्तर्राष्ट्रिय सञ्चारमाध्यमका अनुसार इन्डोनेसियाली दूतावासका अधिकारीले हिसासतमा रहेकी २५ वर्षीया आइस्यालाई शनिबार क्वालालम्पुरमा भेटेका थिए ।

भेटको क्रममा ती महिलाले आफूलाई कसैले ‘रियालिटी जोक सो’का लागि भनेर किम जोङ नामको अनुहारमा बच्चालाई लगाउने तेल दल्नका लागि रकम दिइएको जिकिर गरेकी छन् ।

नामको शवको पोस्टमोर्टमबाट भने अनुहारमा ‘भी एक्स नर्भ एजेन्ट’ नामक रासायनिक पदार्थ प्रयोगबाट मृत्यु भएको पुष्टि भएको थियो । संयुक्त राष्ट्रसंघले उक्त रासायनिकलाई आमविनाशकारी हतियारको सूचीमा राखेको छ । शरीरमा एक थोपामात्र पर्‍यो भने पनि मानिसको केही मिनेटमै मृत्यु हुने चिकित्सकले बताएका छन् ।

गत हप्ता मलेसियाको राजधानी क्वालालम्पुर एअरपोर्टमा दुई महिलाले नामको अनुहारमा उक्त रासायनिक पदार्थ छर्किएपछि बेहोस भएका उनलाई अस्पताल लैजाँदै गर्दा बाटोमा मृत्यु भएको थियो ।

घटनामा संलग्न कम्तीमा सातजना संदिग्धको मलेसियाली प्रहरीले खोजी गरिरहेको छ ।